میں چاہوں بھی تو ضبط گفتگو میں لا نہیں سکتا

میں چاہوں بھی تو ضبط گفتگو میں لا نہیں سکتا

سمجھنے پر بھی دل کا مدعا سمجھا نہیں سکتا

بھلا ایسی تہی داماں تمناؤں سے کیا حاصل

بہلنے پر دل آمادہ ہے اور بہلا نہیں سکتا

خدا محفوظ رکھے خوف آسیب اسیری سے

میں گلشن میں بھی آزادی کا نغمہ گا نہیں سکتا

رگ گل سے بھی نازک تر ہیں تنکے آشیانے کے

انہیں گلچیں ہر انداز نوازش بھا نہیں سکتا

بھرا جائے گا کب تک خون ماضی نبض فردا میں

اب اس پہلو پہ نظم قلب گیتی آ نہیں سکتا

کسے فتنہ سمجھ کر اپنی محفل سے اٹھاتا ہے

ضمیر امن اس دھوکے میں ناداں آ نہیں سکتا

سحاب فکر بھی یعقوبؔ پابند فضا نکلا

چمن کی خاک پر رنگ سخن برسا نہیں سکتا

main chahun bhi to zabt-e-guftugu mein la nahin sakta

samajhne par bhi dil ka muddaa samjha nahin sakta

bhala aisi tahi daman tamannaon se kya hasil

bahalne par dil amada hai aur bahla nahin sakta

khuda mahfuz rakhe khauf aseb-e-asiri se

main gulshan mein bhi azadi ka naghma ga nahin sakta

rag-e-gul se bhi nazuk tar hain tinke ashiyane ke

unhen gulchin har andaz-e-nawazish bha nahin sakta

bhara jaega kab tak khun-e-mazi nabz-e-farda mein

ab is pahlu pe nazm-e-qalb-e-giti a nahin sakta

kise fitna samajh kar apni mahfil se uthata hai

zamir-e-amn is dhoke mein nadan a nahin sakta

sahab-e-fikr bhi yaaqub paband-e-faza nikla

chaman ki khak par rang-e-sukhan barsa nahin sakta