کبھی آنکھوں پہ کبھی سر پہ بٹھائے رکھنا

کبھی آنکھوں پہ کبھی سر پہ بٹھائے رکھنا

زندگی تلخ سہی دل سے لگائے رکھنا

لفظ تو لفظ ہیں کاغذ سے بھی خوشبو پھوٹے

صفحۂ وقت پہ وہ پھول کھلائے رکھنا

چاند کیا چیز ہے سورج بھی ابھر آئے گا

ظلمت شب میں لہو دل کا جلائے رکھنا

حرمت حرف پہ الزام نہ آنے پائے

سخن حق کو سر دار سجائے رکھنا

فرش تو فرش فلک پر بھی سنائی دے گا

میری آواز میں آواز ملائے رکھنا

کبھی وہ یاد بھی آئے تو ملامت کرنا

کبھی اس شوخ کی تصویر بنائے رکھنا

بخشؔ سیکھا ہے شہیدان وفا سے ہم نے

ہاتھ کٹ جائیں علم منہ سے اٹھائے رکھنا

kabhi ankhon pe kabhi sar pe bithae rakhna

zindagi talkh sahi dil se lagae rakhna

lafz to lafz hain kaghaz se bhi khushbu phute

safha-e-waqt pe wo phul khilae rakhna

chand kya chiz hai suraj bhi ubhar aega

zulmat-e-shab mein lahu dil ka jalae rakhna

hurmat-e-harf pe ilzam na ane pae

sukhan-e-haq ko sar-e-dar sajae rakhna

farsh to farsh-e-falak par bhi sunai dega

meri awaz mein awaz milae rakhna

kabhi wo yad bhi ae to malamat karna

kabhi us shokh ki taswir banae rakhna

bakhsh sikha hai shahidan-e-wafa se ham ne

hath kat jaen alam munh se uthae rakhna