میں کہوں کیا انہیں یقیں ہی نہیں

میں کہوں کیا انہیں یقیں ہی نہیں

وہ کہے جاتے ہیں نہیں ہی نہیں

یا کوئی عاشق اس جہاں میں نہیں

یا کوئی آپ سا حسیں ہی نہیں

آپ بے مہر بھی ہیں ظالم بھی

مجھ سے سنئے فقط حسیں ہی نہیں

دیکھے گا جائے گا جو جنت میں

عیش زاہد ہمیں یہیں ہی نہیں

جس پہ کندہ ہو نقش الفت کا

دل سے بہتر کوئی نگیں ہی نہیں

اور کچھ کہئے اس سمجھ پہ انہیں

شیخ صاحب کو آفریں ہی نہیں

دشت وحشت مزے دکھا دیتا

کیا کہیں جیب و آستیں ہی نہیں

یا ترا سنگ در نہیں ظالم

یا مری آج یہ جبیں ہی نہیں

خود اسے اے فہیمؔ کہہ دیکھو

گر مری بات کا یقیں ہی نہیں

main kahun kya unhen yaqin hi nahin

wo kahe jate hain nahin hi nahin

ya koi ashiq is jahan mein nahin

ya koi ap sa hasin hi nahin

ap be mehr bhi hain zalim bhi

mujh se suniye faqat hasin hi nahin

dekhega jaega jo jannat mein

aish zahid hamen yahin hi nahin

jis pe kanda ho naqsh ulfat ka

dil se behtar koi nagin hi nahin

aur kuchh kahiye is samajh pe unhen

shaikh sahab ko afrin hi nahin

dasht-e-wahshat maze dikha deta

kya kahen jeb-o-astin hi nahin

ya tira sang dar nahin zalim

ya miri aj ye jabin hi nahin

khud use ai fahim kah dekho

gar miri bat ka yaqin hi nahin