زمانے کو زیر و زبر کر دیا

زمانے کو زیر و زبر کر دیا

یہ کیا تو نے اے چشم تر کر دیا

لگا رکھنا قاتل کے شایاں نہیں

ادھر کر دیا یا ادھر کر دیا

کیا اور بھی میرے قاصد نے شوخ

جو اس کو مرا نامہ بر کر دیا

صبا نے لگائی کہاں کی کہاں

ادھر آہ کی واں خبر کر دیا

خلش نوک مژگاں کی کچھ کم نہ تھی

بڑھا کر اسے نیشتر کر دیا

مری شمع امید گل ہو گئی

ستم تو نے باد سحر کر دیا

تھپک کر سلایا مجھے بار بار

میں تھا باخبر بے خبر کر دیا

وفائیں ہماری اکارت گئیں

رقیبوں کو جام اس نے بھر کر دیا

جو مدت سے تھی جی میں اب ٹھن گئی

دل پر خطر بے خطر کر دیا

جدھر تیرا تیر نظر چل گیا

ادھر میں نے نذر اک جگر کر دیا

نظر مجھ سے قاتل چرا جائے گا

اگر میں نے سینہ سپر کر دیا

تمہاری خموشی نے اس کو فہیمؔ

ستم گار سے فتنہ گر کر دیا

zamane ko zer-o-zabar kar diya

ye kya tu ne ai chashm-e-tar kar diya

laga rakhna qatil ke shayan nahin

idhar kar diya ya idhar kar diya

kiya aur bhi mere qasid ne shokh

jo us ko mira nama bar kar diya

saba ne lagai kahan ki kahan

idhar ah ki wan khabar kar diya

khalish nok-e-mizhgan ki kuchh kam na thi

barha kar use neshtar kar diya

miri sham-e-ummid gul ho gai

sitam tu ne bad-e-sahar kar diya

thapak kar sulaya mujhe bar bar

main tha bakhabar be khabar kar diya

wafaen hamari akarat gain

raqibon ko jam us ne bhar kar diya

jo muddat se thi ji mein ab than gai

dil pur khatar be khatar kar diya

jidhar tera tir-e-nazar chal gaya

idhar main ne nazr ik jigar kar diya

nazar mujh se qatil chura jaega

agar main ne sina sipar kar diya

tumhari khamoshi ne us ko fahim

sitam gar se fitna gir kar diya