Arooz is now on the App Store, for iPhone and iPad. Download →

All poetry

کچھ کوہکن جو وقف زر و مال ہو گئے

Faheem Jogapuri

کچھ کوہکن جو وقف زر و مال ہو گئے

تیشہ بدست ہو کے بھی کنگال ہو گئے

نام و نمود عزت و شہرت کمال و فن

یہ سب تو میری راہ کے جنجال ہو گئے

کل تک کٹورا لے کے جو پھرتے تھے در بدر

کیسے وہ ایک رات میں خوش حال ہو گئے

اک شخص کے نہ ہونے سے ویراں ہے شہر شہر

سنسان گاؤں گاؤں کے چوپال ہو گئے

طوفاں ستم کے تیر چلاتا ہی رہ گیا

پت جھڑ کے دن شجر کے لئے ڈھال ہو گئے

کیا خیریت فہیمؔ کی اب لینے آئے ہو

اس کو مرے ہوئے تو کئی سال ہو گئے