وہی شام کے دلاسے وہی صبح کے بہانے

وہی شام کے دلاسے وہی صبح کے بہانے

شب تار سے فراغت ملے کب خدا ہی جانے

کہاں وہ خفا خفا تھے کہاں آ گئے منانے

مری جیت بن گئے ہیں مری ہار کے زمانے

نہیں فصل گل کا شیدا مری خواہشوں کا موسم

گل دل کروں جو ارپن مرا دیوتا نہ جانے

شب غم بدل گئی ہے رخ کہکشاں کی صورت

تری یاد سے ہیں روشن مرے غم کے خانے خانے

تری زلف عنبریں تو وہ متاع دل کشی ہے

جسے رات نے چرا لی جسے مانگ لی گھٹا نے

تجھے پا کے بھی نہ پانا تجھے کھو کے پھر مچلنا

یہی الجھنوں کے پھیرے یہی جینے کے بہانے

جو ستم ہے ان کی فطرت تو ہے صبر اپنی عادت

دیا جور و ظلم ان کو ہمیں حوصلہ خدا نے

تری آنکھ کے یہ ساغر لب ناز کے کٹورے

مرے نام آج کر دے یہ سبھی شراب خانے

مرے دل میں اے فہیمؔ اب اٹھے ہیں جو درد پیہم

مجھے یاد آ رہے ہیں وہ شباب کے زمانے

wahi sham ke dilase wahi subh ke bahane

shab-e-tar se faraghat mile kab khuda hi jane

kahan wo khafa khafa the kahan a gae manane

miri jit ban gae hain miri har ke zamane

nahin fasl-e-gul ka shaida miri khwahishon ka mausam

gul dil karun jo arpan mira dewta na jane

shab-e-gham badal gai hai rukh kahkashan ki surat

tiri yad se hain raushan mire gham ke khane khane

tiri zulf-e-ambarin to wo mata-e-dil kashi hai

jise rat ne chura li jise mang li ghata ne

tujhe pa ke bhi na pana tujhe kho ke phir machalna

yahi uljhanon ke phere yahi jine ke bahane

jo sitam hai un ki fitrat to hai sabr apni adat

diya jaur-o-zulm un ko hamen hausla khuda ne

tiri ankh ke ye saghar lab-e-naz ke katore

mire nam aj kar de ye sabhi sharab khane

mire dil mein ai fahim ab uthe hain jo dard-e-paiham

mujhe yad a rahe hain wo shabab ke zamane