خفیف لب پہ تبسم رکا رکا سا لگے

خفیف لب پہ تبسم رکا رکا سا لگے

کہ کوئی غنچۂ نو رس کھلا کھلا سا لگے

جدھر بھی دیکھیے سب کچھ بھلا بھلا سا لگے

یہ تجربہ تو عجب ہی نیا نیا سا لگے

وہ جب رکے تو زمانے کی چال بڑھ جائے

وہ جب چلے تو زمانہ رکا رکا سا لگے

اکڑ کے بات کرے جب زمیں سے بات کرے

وہ آسمان جو ہر سو جھکا جھکا سا لگے

ترے بھی شہر تمنا میں آگ لگ جائے

مرا جو عالم امکاں بجھا بجھا سا لگے

جو رات آئے وہ سہمی ہوئی سی رات آئے

جو آئے دن تو وہ دن بھی ڈرا ڈرا سا لگے

ہیں ساتھ ساتھ مگر دل جدا جدا لے کر

وہ ایک گھر جہاں آنگن بٹا بٹا سا لگے

جسے سمجھتے ہو بھرپور زندگی سے فہیمؔ

قریب جاؤ تو کتنا لٹا لٹا سا لگے

khafif lab pe tabassum ruka ruka sa lage

ke koi ghuncha-e-nau ras khula khula sa lage

jidhar bhi dekhiye sab kuchh bhala bhala sa lage

ye tajriba to ajab hi naya naya sa lage

wo jab ruke to zamane ki chal barh jae

wo jab chale to zamana ruka ruka sa lage

akkar ke bat kare jab zamin se bat kare

wo asman jo har su jhuka jhuka sa lage

tire bhi shahr-e-tamanna mein ag lag jae

mira jo alam-e-imkan bujha bujha sa lage

jo rat ae wo sahmi hui si rat ae

jo ae din to wo din bhi dara dara sa lage

hain sath sath magar dil juda juda le kar

wo ek ghar jahan angan bata bata sa lage

jise samajhte ho bharpur zindagi se fahim

qarib jao to kitna luta luta sa lage