گزرے تمام عمر عجب امتحاں سے ہم

گزرے تمام عمر عجب امتحاں سے ہم

الجھے کبھی زمیں سے کبھی آسماں سے ہم

اس آئنے کو موسم گل کی تلاش ہے

عہد شباب ڈھونڈ کے لائیں کہاں سے ہم

جیسے وہ آسمان ہی مٹھی میں آ گیا

تھے اتنا خوش گمان کسی بد گماں سے ہم

آوارگیٔ شوق میں سود و زیاں ہے کیا

یہ کاروبار سیکھ رہے ہیں دھواں سے ہم

تنقید کر رہے ہیں اسی کی زبان پر

الفاظ لے کے آئے ہیں جس داستاں سے ہم

جو نگہ انتخاب کے قابل نہ تھا کبھی

آنکھیں لڑانے بیٹھ گئے اس جہاں سے ہم

اقرار کو بنا گئے انکار وہ فہیمؔ

کہتے تھے جو پلٹتے نہیں ہیں بیاں سے ہم

guzre tamam umr ajab imtihan se ham

uljhe kabhi zamin se kabhi asman se ham

is aine ko mausam-e-gul ki talash hai

ahd-e-shabab dhund ke laen kahan se ham

jaise wo asman hi mutthi mein a gaya

the itna khush guman kisi bad guman se ham

awargi-e-shauq mein sud-o-ziyan hai kya

ye karobar-e-sikh rahe hain dhuan se ham

tanqid kar rahe hain usi ki zaban par

alfaz le ke ae hain jis dastan se ham

jo nigah-e-intikhab ke qabil na tha kabhi

ankhen larane baith gae is jahan se ham

iqrar ko bana gae inkar wo fahim

kahte the jo palatte nahin hain bayan se ham