دیکھتی ہے نگاہ پانی میں

دیکھتی ہے نگاہ پانی میں

تخت عالم پناہ پانی میں

ہم سے سیلاب کا مزہ پوچھو

ہم ہوئے ہیں تباہ پانی میں

کیا سمجھتے ہیں آپ گنگا جل

دھل گئے کیا گناہ پانی میں

میں سناتا ہوں پتھروں کو غزل

اور ہوتی ہے واہ پانی میں

کشتئ دل کو اب پناہ کہاں

لہر ہے بے پناہ پانی میں

وہ مری مملکت میں آ ہی گئے

میں ہوا بادشاہ پانی میں

موج ہے یا ادا حسینوں کی

گاہ ساحل پہ گاہ پانی میں

آ ہی جائے گا راہ پر دریا

تم نکالو تو راہ پانی میں

تو بھی تشنہ ہے اور میں بھی ہوں

خوب ہوگی نباہ پانی میں

تیری آرام گاہ ساحل پر

میری آرام گاہ پانی میں

تو بتا کیوں فہیمؔ ڈوب گیا

تو رہا ہے گواہ پانی میں

dekhti hai nigah pani mein

takht-e-alam panah pani mein

ham se sailab ka maza puchho

ham hue hain tabah pani mein

kya samajhte hain ap ganga jal

dhul gae kya gunah pani mein

main sunata hun pattharon ko ghazal

aur hoti hai wah pani mein

kashti-e-dil ko ab panah kahan

lahr hai be panah pani mein

wo miri mamlukat mein a hi gae

main hua badshah pani mein

mauj hai ya ada hasinon ki

gah-e-sahil pe gah pani mein

a hi jaega rah par dariya

tum nikalo to rah pani mein

tu bhi tishna hai aur main bhi hun

khub hogi nibah pani mein

teri aram gah-e-sahil par

meri aram gah pani mein

tu bata kyun fahim dub gaya

tu raha hai gawah pani mein