پریشانی کہاں کی اور سکوں کیا

پریشانی کہاں کی اور سکوں کیا

یہی ہے زندگی تو سر دھنوں کیا

کوئی سنتا نہیں شیشوں کے گھر میں

تمہارے شہر میں پتھر چنوں کیا

جنہیں گننے میں ٹوٹی سانس ڈوری

انہیں سانسوں کا جرمانہ بھروں کیا

کسی ظالم کے آگے سر جھکاؤں

بزرگوں کی روایت توڑ دوں کیا

مرے دست طلب کو روکتی ہے

بتا اے مفلسی آخر کروں کیا

خدا سے اس لیے مانگا نہیں کچھ

وہ سب کچھ جانتا ہے میں کہوں کیا

کروں کیا پیروی اہل ہوس کی

تری جانب قدم گن کر رکھوں کیا

pareshani kahan ki aur sukun kya

yahi hai zindagi to sar dhunun kya

koi sunta nahin shishon ke ghar mein

tumhare shahr mein patthar chunun kya

jinhen ginne mein tuti sans dori

unhen sanson ka jurmana bharun kya

kisi zalim ke age sar jhukaun

buzurgon ki riwayat tor dun kya

mire dast-e-talab ko rokti hai

bata ai muflisi akhir karun kya

khuda se is liye manga nahin kuchh

wo sab kuchh janta hai main kahun kya

karun kya pairawi ahl-e-hawas ki

tiri janib qadam gin kar rakhun kya