غم بھی صدیوں سے ہیں اور دیدۂ تر صدیوں سے

غم بھی صدیوں سے ہیں اور دیدۂ تر صدیوں سے

خانہ بربادوں کے آباد ہیں گھر صدیوں سے

در بدر ان کا بھٹکنا تو نئی بات نہیں

چاہنے والے تو ہیں خاک بسر صدیوں سے

کوئی مشکل نہ مسافت ہے نہ رستے کی تھکن

اصل زنجیر ہے سامان سفر صدیوں سے

تجھ سے ملنے کے سوا ساری دعائیں گلشن

اک یہی شاخ ہے بے برگ و ثمر صدیوں سے

کیا مسافر ہیں یہ رستے میں بھٹکنے والے

جیسے بے سمت گھٹاؤں کا سفر صدیوں سے

کس نے دیکھی ہے زمانے میں وفا کی خوشبو

یہ کہانی ہے کتابوں میں مگر صدیوں سے

ہر زمانے میں خوشامد نے صدارت کی ہے

کامراں ہوتا رہا ہے یہ ہنر صدیوں سے

ماسوا حسن کہیں عشق نے دیکھا نہ فہیمؔ

ایک ہی سمت کو جامد ہے نظر صدیوں سے

gham bhi sadiyon se hain aur dida-e-tar sadiyon se

khana barbadon ke abad hain ghar sadiyon se

dar badar un ka bhatakna to nai bat nahin

chahne wale to hain khak basar sadiyon se

koi mushkil na masafat hai na raste ki thakan

asl-e-zanjir hai saman-e-safar sadiyon se

tujh se milne ke siwa sari duaen gulshan

ik yahi shakh hai be barg-o-samar sadiyon se

kya musafir hain ye raste mein bhatakne wale

jaise be samt ghataon ka safar sadiyon se

kis ne dekhi hai zamane mein wafa ki khushbu

ye kahani hai kitabon mein magar sadiyon se

har zamane mein khushamad ne sadarat ki hai

kamran hota raha hai ye hunar sadiyon se

masiwa husn kahin ishq ne dekha na fahim

ek hi samt ko jamid hai nazar sadiyon se