فلک پہ ہنسنے لگے چاند تارے شام کے بعد

فلک پہ ہنسنے لگے چاند تارے شام کے بعد

ہمیں اداس ہیں دریا کنارے شام کے بعد

کھنکتی چوڑیاں خوشبوئیں پیار کی باتیں

تمام وصل کے ہیں استعارے شام کے بعد

ہمارے دن پہ زمانے کا جو تصرف ہو

ہماری رات ہے اور ہم تمہارے شام کے بعد

نکلیے گھر سے تو دامن میں آ ہی جاتے ہیں

دو ایک بھٹکے ہوئے ماہ پارے شام کے بعد

سنہری مچھلیاں ڈر جاتی ہیں اندھیروں سے

سو کون جھیل میں کشتی اتارے شام کے بعد

کہیں بھی دن میں بھٹکتا رہوں مگر وہ گلی

ادھر ہی راستے مڑ جائیں سارے شام کے بعد

اداس رات کے آنگن میں درد کی دیوی

بڑے ہی چاؤ سے زلفیں سنوارے شام کے بعد

کھلا تھا سامنے اک روز باب شہر بدن

کسے بتائیں جو دیکھے نظارے شام کے بعد

تمام دن پہ حکومت رہی ہماری فہیمؔ

ہم اپنے وقت کے سورج تھے ہارے شام کے بعد

falak pe hansne lage chand tare sham ke baad

hamen udas hain dariya kinare sham ke baad

khanakti chauriyan khushbuen pyar ki baten

tamam wasl ke hain istiare sham ke baad

hamare din pe zamane ka jo tasarruf ho

hamari rat hai aur ham tumhare sham ke baad

nikaliye ghar se to daman mein a hi jate hain

do ek bhatke hue mah pare sham ke baad

sunahri machhliyan dar jati hain andheron se

so kaun jhil mein kashti utare sham ke baad

kahin bhi din mein bhatakta rahun magar wo gali

idhar hi raste mur jaen sare sham ke baad

udas rat ke angan mein dard ki dewi

bare hi chao se zulfen sanware sham ke baad

khula tha samne ik roz bab-e-shahr badan

kise bataen jo dekhe nazare sham ke baad

tamam din pe hukumat rahi hamari fahim

ham apne waqt ke suraj the hare sham ke baad