گھر بناتے وقت اس کا دھیان ہونا چاہئے

گھر بناتے وقت اس کا دھیان ہونا چاہئے

دھوپ رکھنے کے لئے دالان ہونا چاہئے

تنگ گلیوں کی طرح ہرگز نہ رسم و راہ ہو

دوستی میں دل کھلا میدان ہونا چاہئے

خوب صورت گفتگو کیا استعاروں کے بغیر

اس صحیفے کے لئے جزدان ہونا چاہئے

ہو سکے تازہ ہوا کا محبس جاں میں گزر

دل کی دیواروں میں روشن دان ہونا چاہئے

صرف گل پوشی نہیں ہے میہمانی کی دلیل

میزباں کی آنکھ میں گلدان ہونا چاہئے

صاحب فہم و درک ہونے پہ بھی اولاد کو

باپ ماں کے سامنے نادان ہونا چاہئے

چند لمحوں کو ٹھہرنا ہے یہاں جبکہ فہیمؔ

کم بہت ہی کم سر و سامان ہونا چاہئے

ghar banate waqt us ka dhyan hona chahiye

dhup rakhne ke liye dalan hona chahiye

tang galiyon ki tarah hargiz na rasm-o-rah ho

dosti mein dil khula maidan hona chahiye

khub surat guftugu kya istiaron ke baghair

is sahife ke liye juzdan hona chahiye

ho sake taza hawa ka mahbas-e-jan mein guzar

dil ki diwaron mein raushan dan hona chahiye

sirf-e-gul poshi nahin hai mehmani ki dalil

mezban ki ankh mein guldan hona chahiye

sahab fahm-o-dark hone pe bhi aulad ko

bap man ke samne nadan hona chahiye

chand lamhon ko thaharna hai yahan jabke fahim

kam bahut hi kam sar-o-saman hona chahiye