یاد کر کر کے تری یاد مٹانے نکلے

یاد کر کر کے تری یاد مٹانے نکلے

لے کے گھی ہاتھ میں ہم آگ بجھانے نکلے

ہم فقیروں کے قلم سے جو خزانے نکلے

جھولیاں لے کے شہنشاہ چرانے نکلے

جیسے جنگل میں کوئی رات بتانے نکلے

گھر سے نکلے تو لگا جان گنوانے نکلے

اپنی حالت کا اب احساس ہوا ہے ایسے

جیسے چھپر کوئی برسات میں چھانے نکلے

بھوکی دھرتی کی انا آ گئی دامن میں مگر

سارے آکاش میں دو چار ہی دانے نکلے

کچھ تھکے ماندوں پہ کتوں کا برسنا دیکھا

جب وہ فٹ پاتھ پہ اخبار بچھانے نکلے

خود کو سمجھاتے ہوئے شہر سے یوں لوٹے ہیں

جیسے پردیس کوئی گھر سے کمانے نکلے

ایسے انساں سے ملاقات نہ کرنا بہتر

دل کے آنگن میں جو دیوار اٹھانے نکلے

سادے لوگوں کو بہت تنگ کیا ہے تو نے

ہم ہی دیوانوں سے بل تیرے زمانے نکلے

شعر کہتے ہیں جسے بات وہیں ختم ہوئی

ہم تو بس میرؔ کی اک رسم نبھانے نکلے

yad kar kar ke tiri yad mitane nikle

le ke ghi hath mein ham ag bujhane nikle

ham faqiron ke qalam se jo khazane nikle

jholiyan le ke shahanshah churane nikle

jaise jangal mein koi rat batane nikle

ghar se nikle to laga jan ganwane nikle

apni halat ka ab ehsas hua hai aise

jaise chhappar koi barsat mein chhane nikle

bhuki dharti ki ana a gai daman mein magar

sare akash mein do char hi dane nikle

kuchh thake mandon pe kutton ka barasna dekha

jab wo fit path pe akhbar bichhane nikle

khud ko samjhate hue shahr se yun laute hain

jaise pardes koi ghar se kamane nikle

aise insan se mulaqat na karna behtar

dil ke angan mein jo diwar uthane nikle

sade logon ko bahut tang kya hai tu ne

ham hi diwanon se bal tere zamane nikle

sher kahte hain jise bat wahin khatm hui

ham to bas mir ki ik rasm nibhane nikle