آنا تھا جسے آج وہ آیا تو نہیں ہے

آنا تھا جسے آج وہ آیا تو نہیں ہے

یہ وقت بدلنے کا اشارا تو نہیں ہے

دعوت دے کبھی کیوں وہ محبت سے بلائے

دریا سے مری پیاس کا رشتہ تو نہیں ہے

یہ کون گیا ہے کہ جھپکتی نہیں آنکھیں

رستے میں وہ ٹھہرا ہوا لمحہ تو نہیں ہے

ہنستا ہوا چہرہ ہے دمکتا ہوا پیکر

گزرا ہوا یہ میرا زمانہ تو نہیں ہے

آنکھوں نے ابھی نیند کا دامن نہیں چھوڑا

خوابوں سے بھروسہ ابھی ٹوٹا تو نہیں ہے

دریا میں سر شام ہے ڈوبا ہوا سورج

دن بھر کا مسافر کوئی پیاسا تو نہیں ہے

چھوڑ آئے ہو جس کے لئے آنچل کی گھنی چھاؤں

اس شہر میں وہ دھوپ کا ٹکڑا تو نہیں ہے

رستے میں فہیمؔ اس کی طبیعت کا بگڑنا

گھر جانے کا اک اور بہانہ تو نہیں ہے

ana tha jise aj wo aya to nahin hai

ye waqt badalne ka ishara to nahin hai

daawat de kabhi kyun wo mohabbat se bulae

dariya se miri pyas ka rishta to nahin hai

ye kaun gaya hai ke jhapakti nahin ankhen

raste mein wo thahra hua lamha to nahin hai

hansta hua chehra hai damakta hua paikar

guzra hua ye mera zamana to nahin hai

ankhon ne abhi nind ka daman nahin chhora

khwabon se bharosa abhi tuta to nahin hai

dariya mein sar-e-sham hai duba hua suraj

din bhar ka musafir koi pyasa to nahin hai

chhor ae ho jis ke liye anchal ki ghani chhaon

is shahr mein wo dhup ka tukra to nahin hai

raste mein fahim us ki tabiat ka bigarna

ghar jane ka ik aur bahana to nahin hai