اپنے قدم کی چاپ سے یوں ڈر رہے ہیں ہم

اپنے قدم کی چاپ سے یوں ڈر رہے ہیں ہم

مقتل کی سمت جیسے سفر کر رہے ہیں ہم

کیا چاند اور تاروں کو ہم جانتے نہیں

اے آسمان والو زمیں پر رہے ہیں ہم

مشکل تھا سطح آب سے ہم کو کھنگالنا

باہر نہیں تھے جتنا کہ اندر رہے ہیں ہم

کل اور کوئی وقت کی آنکھوں میں ہو تو کیا

اب تک تو ہر نگاہ کا محور رہے ہیں ہم

دیر و حرم سے اور بھی آگے نکل گئے

ہاں عقل کی حدود سے باہر رہے ہیں ہم

اے ہم سفر نہ پوچھ مسافت نصیب سے

تو جانتا ہے کتنے دنوں گھر رہے ہیں ہم

باہر نہ آئے ہم بھی انا کے حصار سے

اس جنگ میں تمہارے برابر رہے ہیں ہم

جھرنوں کی کیا بساط کریں گفتگو فہیمؔ

دریا گرے جہاں وہ سمندر رہے ہیں ہم

apne qadam ki chap se yun dar rahe hain ham

maqtal ki samt jaise safar kar rahe hain ham

kya chand aur taron ko ham jante nahin

ai asman walo zamin par rahe hain ham

mushkil tha sath-e-ab se ham ko khangalna

bahar nahin the jitna ke andar rahe hain ham

kal aur koi waqt ki ankhon mein ho to kya

ab tak to har nigah ka mehwar rahe hain ham

dair-o-haram se aur bhi age nikal gae

han aql ki hudud se bahar rahe hain ham

ai ham safar na puchh masafat nasib se

tu janta hai kitne dinon ghar rahe hain ham

bahar na ae ham bhi ana ke hisar se

is jang mein tumhare barabar rahe hain ham

jharnon ki kya bisat karen guftugu fahim

dariya gire jahan wo samundar rahe hain ham