Arooz is now on the App Store, for iPhone and iPad. Download →

All poetry

شہیدوں کا ترے شہرہ زمیں سے آسماں تک ہے

Urooj Qadri

شہیدوں کا ترے شہرہ زمیں سے آسماں تک ہے

فلک سے بلکہ آگے بڑھ کے تیرے آستاں تک ہے

جمال جاں فزا کا ان کے دل کش دل ربا جلوہ

زمیں سے آسماں تک ہے مکاں سے لا مکاں تک ہے

رہیں سب مطمئن گلشن میں اپنے آشیانوں سے

کہ جولاں گاہ بجلی کی ہمارے آشیاں تک ہے

نصیحت پر عمل خود بھی تو کرنا چاہئے واعظ

اثر کیا ہو کہ تیرا وعظ تو نوک زباں تک ہے

مسلمانی فقط تسبیح خوانی ہی نہیں ہمدم

مسلمانی کا لمبا ہاتھ شمشیر و سناں تک ہے

بڑھاپا فکر پر آئے تو نکبت ساتھ آتی ہے

ترقی اور عظمت قوم کی فکر جواں تک ہے

فقط دنیا ہی اس کی گونج کا حلقہ نہیں ہرگز

تری حمد و ثنا کی گونج گلزار جناں تک ہے

میں ہوں پیغام حق اسلام میرا نام نامی ہے

جہاں تک ہے یہ دنیا میرا حلقہ بھی وہاں تک ہے

وہی الفاظ ہیں موزوں اگر ہوں شعر ہوتے میں

حقیقت شاعری کے فن کی بس حسن بیاں تک ہے

طویل اتنی ہے زنجیر اسیری اس زمانے میں

کہ حاضر قید خانے میں عروجؔ ناتواں تک ہے