دنیا سے بے شمار مسلماں گزر گئے

دنیا سے بے شمار مسلماں گزر گئے

حسن ازل پہ ششدر و حیراں گزر گئے

ممکن نہ تھا کہ دید کی نعمت یہاں ملے

دل میں لئے وصال کے ارماں گزر گئے

انسانیت کو ناز تھا جن کے وجود پر

ایسے بھی جانے کتنے ہی انساں گزر گئے

عالم فنا پذیر ہے باقی ہے ذات حق

لاکھوں کروڑوں حضرت انساں گزر گئے

طوفاں جو اٹھ رہا ہے وہ بیٹھے گا ایک دن

ایسے نہ جانے کتنے ہی طوفاں گزر گئے

اسلام کا محافظ و نگراں ہے خود خدا

ہم جیسے جانے کتنے مسلماں گزر گئے

حسن ازل ہے آج بھی جلوہ فگن عروجؔ

حسن ازل کے لاکھ غزل خواں گزر گئے

duniya se be shumar musalman guzar gae

husn-e-azal pe shashdar-o-hairan guzar gae

mumkin na tha ke did ki nemat yahan mile

dil mein liye wisal ke arman guzar gae

insaniyat ko naz tha jin ke wajud par

aise bhi jane kitne hi insan guzar gae

alam fana pazir hai baqi hai zat-e-haq

lakhon karoron hazrat-e-insan guzar gae

tufan jo uth raha hai wo baithega ek din

aise na jane kitne hi tufan guzar gae

islam ka muhafiz-o-nigaran hai khud khuda

ham jaise jane kitne musalman guzar gae

husn-e-azal hai aj bhi jalwa fagan uruj

husn-e-azal ke lakh ghazal khwan guzar gae