بھری بزم میں گل فشاں اور بھی ہیں

بھری بزم میں گل فشاں اور بھی ہیں

ہمارے سوا نکتہ داں اور بھی ہیں

یہ دنیا تو مٹ جانے والی ہے لیکن

زمیں اور بھی آسماں اور بھی ہیں

یہ دنیا تو اک ذرۂ مختصر ہے

مکیں اور بھی ہیں مکاں اور بھی ہیں

نہ تنہا مرا کارواں راہ میں ہے

رہ عشق میں کارواں اور بھی ہیں

نہ ہو مطمئن ایک پتھر ہٹا کر

کہ رستے میں سنگ گراں اور بھی ہیں

اگر جی لگے آپ کا تو سناؤں

فسانے کئی بر زباں اور بھی ہیں

کہو بجلیوں سے کہ برسیں مسلسل

ابھی باغ میں آشیاں اور بھی ہیں

عروجؔ اپنے گوشے سے باہر تو نکلو

کہ باہر ہزاروں جہاں اور بھی ہیں

bhari bazm mein gul fishan aur bhi hain

hamare siwa nukta dan aur bhi hain

ye duniya to mit jane wali hai lekin

zamin aur bhi asman aur bhi hain

ye duniya to ik zarra-e-mukhtasar hai

makin aur bhi hain makan aur bhi hain

na tanha mira karwan rah mein hai

rah-e-ishq mein karwan aur bhi hain

na ho mutmain ek patthar hata kar

ke raste mein sang-e-giran aur bhi hain

agar ji lage ap ka to sunaun

fasane kai bar zaban aur bhi hain

kaho bijliyon se ke barsen musalsal

abhi bagh mein ashiyan aur bhi hain

uruj apne goshe se bahar to niklo

ke bahar hazaron jahan aur bhi hain