ترے دریدہ گریباں میں یہ رفو کیا ہے

ترے دریدہ گریباں میں یہ رفو کیا ہے

تجھے خبر نہیں مجنوں کی آبرو کیا ہے

مجھے تو آپ کی آنکھوں نے کر دیا سرشار

مجھے خبر ہی نہیں جام کیا سبو کیا ہے

نہ جانے ہوگا بھی دونوں میں اتفاق کبھی

مزاج حسن ہے کیا میری آرزو کیا ہے

مجاز ہے کہ حقیقت ثواب ہے کہ گناہ

پتہ نہیں کہ یہ دنیائے رنگ و بو کیا ہے

لہو تو وہ ہے جو ابلے شہید کی رگ سے

رگ گلو سے نہ ابلا تو پھر لہو کیا ہے

مجھے ہے جرم محبت کا اعتراف عروجؔ

مری سزا میں کوئی بحث و گفتگو کیا ہے

بڑے بڑوں کے قدم جس مقام پر لرزیں

عروجؔ تو ہی بتا اس جگہ پہ تو کیا ہے

tire darida gareban mein ye rafu kya hai

tujhe khabar nahin majnun ki abru kya hai

mujhe to ap ki ankhon ne kar diya sarshar

mujhe khabar hi nahin jam kya subu kya hai

na jane hoga bhi donon mein ittifaq kabhi

mizaj-e-husn hai kya meri arzu kya hai

majaz hai ke haqiqat sawab hai ke gunah

pata nahin ke ye duniya-e-rang-o-bu kya hai

lahu to wo hai jo uble shahid ki rag se

rag-e-galo se na ubla to phir lahu kya hai

mujhe hai jurm-e-mohabbat ka etiraf uruj

miri saza mein koi bahs-o-guftugu kya hai

bare baron ke qadam jis maqam par larzen

uruj tu hi bata is jagah pe to kya hai