بنی ہوئی ہیں مرے دل کی ترجماں آنکھیں

بنی ہوئی ہیں مرے دل کی ترجماں آنکھیں

سنا رہی ہیں محبت کی داستاں آنکھیں

نہ تھی زباں کو اجازت کہ حال دل کہتی

زبان اشک سے کرتی رہیں بیاں آنکھیں

کبھی چھپی ہے محبت کہ میں چھپا لیتا

زباں جو بند ہوئی بن گئیں زباں آنکھیں

بناؤ دامن سادہ پہ ان سے گل بوٹے

قبول ہو تو کروں نذر خوں فشاں آنکھیں

میں عندلیب ہوں پھولوں کی دید میری حیات

پروں کو باندھ نہ کر بند باغباں آنکھیں

شرافت نگہ پاک کا ہے نگراں دل

طہارت دل مومن کی پاسباں آنکھیں

عروجؔ بڑھ کے کرو پیش دل کا نذرانہ

تمہیں کو تاک رہی ہیں وہ دل ستاں آنکھیں