وفا کر رہا ہوں جفا چاہتا ہوں

وفا کر رہا ہوں جفا چاہتا ہوں

خطا کر رہا ہوں سزا چاہتا ہوں

محبت کا یہ بھی کوئی مرحلہ ہے

کہ میں نالۂ نارسا چاہتا ہوں

نگاہوں کی عفت دلوں کی طہارت

میں سر سے قدم تک حیا چاہتا ہوں

تردد توہم کی ظلمت مٹا کر

میں علم و یقیں کی ضیا چاہتا ہوں

میں اخلاق و کردار و روحانیت میں

تنزل نہیں ارتقا چاہتا ہوں

خدا کی شریعت ہو نافذ زمیں پر

میں انسانیت کی بقا چاہتا ہوں

ہے جنت تو تیری رضا کی علامت

الٰہی میں تیری رضا چاہتا ہوں

عروجؔ ان کا پیغام پہنچا تو مجھ تک

مگر میں کچھ اس سے سوا چاہتا ہوں

wafa kar raha hun jafa chahta hun

khata kar raha hun saza chahta hun

mohabbat ka ye bhi koi marhala hai

ke main nala-e-narasa chahta hun

nigahon ki iffat dilon ki taharat

main sar se qadam tak haya chahta hun

taraddud tawahhum ki zulmat mita kar

main ilm-o-yaqin ki ziya chahta hun

main akhlaq-o-kirdar-o-ruhaniyat mein

tanazzul nahin irtiqa chahta hun

khuda ki shariat ho nafiz zamin par

main insaniyat ki baqa chahta hun

hai jannat to teri raza ki alamat

ilahi mein teri raza chahta hun

uruj un ka paigham pahuncha to mujh tak

magar main kuchh us se siwa chahta hun