آئی ہے پھر بہار کیا کہنا

آئی ہے پھر بہار کیا کہنا

چشم ہیں اشک بار کیا کہنا

مثل سیماب مضطرب کیوں ہے

اے دل بے قرار کیا کہنا

اب نہ جائیں گے غیر کے در پر

کہہ دیا ایک بار کیا کہنا

قبر میں بھی کھلی رہیں آنکھیں

واہ رے انتظار کیا کہنا

ڈر نہ تو ساتھ میرے چل زاہد

ساقی اپنا ہے یار کیا کہنا

پہلی منزل پہ تھک کے بیٹھ گئے

وائے بر جان زار کیا کہنا

نعت احمد سے ہے قمرؔ شہرت

ایسی شہرت کی یار کیا کہنا

عرصۂ کائنات موج سراب

دیدۂ تشنہ کار کیا کہنا

ایک ہی وار میں اتارا سر

تیغ قاتل کی دھار کیا کہنا

میرے خواجہ حسن نظامی کا

دل آئینہ دار کیا کہنا

ان طبیبوں سے ہوں میں بے پروا

شوق دیدار یار کیا کہنا

پوچھتا کیا ہے حال مہجوری

میں ہوں بستر کا تار کیا کہنا

اس حنا بستہ پائے رنگیں کا

اے دل خوں فشار کیا کہنا

شکر اے موسم بہار جنوں

جامۂ تار تار کیا کہنا

ہم سے دوری ہے غیر سے قربت

نحن اقرب نگار کیا کہنا

بلبل بوستان احمد ہوں

نغمۂ صد ہزار کیا کہنا

ہاں مدینہ ہے رشک خلد بریں

اس چمن کی بہار کیا کہنا

دل اسیری سے پیچ و تاب میں ہے

گیسوئے پیچ دار کیا کہنا

در دنداں کی گرمی و تابش

اے در آبدار کیا کہنا

مجھے سودا ہے میں پریشاں ہوں

زلف کا انتشار کیا کہنا

فتنہ پرداز و تفرقہ انداز

فلک بے وقار کیا کہنا

مثل پروانہ تم پہ مرتا ہے

قمرؔ جاں نثار کیا کہنا

ai hai phir bahar kya kahna

chashm hain ashk bar kya kahna

misl-e-simab muztarib kyun hai

ai dil-e-be qarar kya kahna

ab na jaenge ghair ke dar par

kah diya ek bar kya kahna

qabr mein bhi khuli rahen ankhen

wah re intizar kya kahna

dar na to sath mere chal zahid

saqi apna hai yar kya kahna

pahli manzil pe thak ke baith gae

wae bar jan-e-zar kya kahna

naat-e-ahmad se hai qamar shohrat

aisi shohrat ki yar kya kahna

arsa-e-kainat mauj-e-sarab

dida-e-tishna kar kya kahna

ek hi war mein utara sar

tegh-e-qatil ki dhar kya kahna

mere khwaja husn nizami ka

dil-e-aina dar kya kahna

in tabibon se hun main be parwa

shauq-e-didar-e-yar kya kahna

puchhta kya hai hal-e-mahjuri

main hun bistar ka tar kya kahna

is hina basta pae rangin ka

ai dil-e-khun fishar kya kahna

shukr ai mausam-e-bahar-e-junun

jama-e-tar tar kya kahna

ham se duri hai ghair se qurbat

nahnu aqrab nigar kya kahna

bulbul-e-bostan ahmad hun

naghma-e-sad hazar kya kahna

han madina hai rashk-e-khuld-e-barin

is chaman ki bahar kya kahna

dil asiri se pech-o-tab mein hai

gesu-e-pech dar kya kahna

dar-e-dandan ki garmi-o-tabish

ai dar-e-abdar kya kahna

mujhe sauda hai main pareshan hun

zulf ka intishar kya kahna

fitna pardaz-o-tafriqa andaz

falak-e-be waqar kya kahna

misl-e-parwana tum pe marta hai

qamar-e-jan nisar kya kahna