مدت سے ہے ملنے کی تمنا مرے دل میں

مدت سے ہے ملنے کی تمنا مرے دل میں

بلوائیے یا آئیے شاہا مرے دل میں

ہے خوف نہ دنیا کا نہ اندیشۂ عقبیٰ

ہے تیرے ہی رحمت کا بھروسا مرے دل میں

بیمار ہے بیماریٔ عصیاں سے مرا دل

آ جاؤ کبھی میرے مسیحا مرے دل میں

زلف و رخ محبوب کا رہتا ہے تصور

کعبہ مرے دل میں ہے کلیسا مرے دل میں

بس ایک تمنا ہے دکھا دیجئے جلوہ

واللہ نہیں اور تمنا مرے دل میں

لگتا نہیں دل اپنا تماشائے جہاں میں

جب سے کہ کھنچا ہے ترا نقشہ مرے دل میں

سیماب کی مانند تڑپتا ہے دل زار

ہوتا ہے نیا روز تماشا مرے دل میں

ہر داغ مرے سینہ کا رہتا ہے درخشاں

موسیٰ کی طرح ہے ید بیضا مرے دل میں

ہاتھوں پہ ہو ساقی کے قمرؔ جان تصدق

کچھ رنگ عجب کر دیا پیدا مرے دل میں