Arooz is now on the App Store, for iPhone and iPad. Download →

All poetry

تری صورت میں وہ جلوہ دکھا کر

Qamar Hilali

تری صورت میں وہ جلوہ دکھا کر

رکھا ہے مجھ کو دیوانہ بنا کر

صدائے سرمدی اپنا سنا کر

کیا ہشیار دیوانہ بنا کر

کیا بے ہوش موسیٰ کو بلا کر

تجلی طور پر اپنی دکھا کر

بڑی مشکل سے سمجھا کر منا کر

اسے دل میں رکھا مہماں بنا کر

صبا للہ یہ مشت خاک میری

ذرا لے چل مدینہ تک اڑا کر

اگر ہوگی مدینہ تک رسائی

کروں گا عرض درد دل سنا کر

مرے مولا مرے سرکار للہ

رکھو مجھ کو مدینہ میں بلا کر

کروں گا ان کی زلف عنبریں میں

دل صد چاک کو شانہ بنا کر

نظر آ جائیں جب وہ شاہ خوباں

رکھوں گا اپنی آنکھوں میں چھپا کر

اٹھیں گے ہم نہ ہرگز تا قیامت

در محبوب پر آسن جما کر

گزرتی تھی کسی عالم میں اچھی

ہوئے بدنام اس عالم میں آ کر

نظر بھر کر ابھی دیکھا نہیں تھا

کیا بسمل مجھے آنکھیں دکھا کر

مکاں میں میرے جس دن آئیں گے وہ

بلاؤں گا انہیں آنکھیں بچھا کر

نہ آنا تھا تمہیں پہلے ہی باہر

چھپے پھر کس لئے صورت بتا کر

الگ ہو کر تماشا دیکھتے ہو

ہمیں دنیا کے جھگڑوں میں پھنسا کر

مقابل اپنے تصویر محمد

لگا رکھی ہے آئینہ بنا کر

رہے دائم سلامت دین و ایماں

وہ بت کہتا ہے مجھ سے یوں دعا کر

قمرؔ اپنی حقیقت کو سمجھ کر

اسے دیکھو خودی اپنی مٹا کر