سنگ طفلاں کا ہدف جسم ہمارا نکلا

سنگ طفلاں کا ہدف جسم ہمارا نکلا

ہم تو جس شہر گئے شہر تمہارا نکلا

کس سے امید کریں کوئی علاج دل کی

چارہ گر بھی تو بہت درد کا مارا نکلا

جانے مدت پہ تری یاد کدھر سے آئی

راکھ کے ڈھیر میں پوشیدہ شرارا نکلا

دل پہ کیا جانے گزر جاتی ہے کیا پچھلے پہر

اوس ٹپکی تو کہیں صبح کا تارہ نکلا

جاتے جاتے دیا اس طرح دلاسا اس نے

بیچ دریا میں کوئی جیسے کنارہ نکلا

کوئی صحرا کا حوالہ نہ سمندر کی مثال

جو بھی ڈوبا ہے جہاں دوست ہمارا نکلا

بوالہوس ضد میں سہی دار و رسن سے گزرا

اب پشیماں ہے کہ سودا یہ خسارہ نکلا

sang tiflan ka hadaf jism hamara nikla

ham to jis shahr gae shahr tumhara nikla

kis se ummid karen koi ilaj-e-dil ki

chara gar bhi to bahut dard ka mara nikla

jane muddat pe tiri yad kidhar se ai

rakh ke dher mein poshida sharara nikla

dil pe kya jane guzar jati hai kya pichhle pahar

os tapki to kahin subh ka tara nikla

jate jate diya is tarah dilasa us ne

bich dariya mein koi jaise kinara nikla

koi sahra ka hawala na samundar ki misal

jo bhi duba hai jahan dost hamara nikla

bawalhos zid mein sahi dar-o-rasan se guzra

ab pasheman hai ke sauda ye khasara nikla