دربار میں اب سطوت شاہی کی علامت — فیض احمد فیض (Faiz Ahmad Faiz)

دربار میں اب سطوت شاہی کی علامت

درباں کا عصا ہے کہ مصنف کا قلم ہے

آوارہ ہے پھر کوہ ندا پر جو بشارت

تمہید مسرت ہے کہ طول شب غم ہے

جس دھجی کو گلیوں میں لیے پھرتے ہیں طفلاں

یہ میرا گریباں ہے کہ لشکر کا علم ہے

جس نور سے ہے شہر کی دیوار درخشاں

یہ خون شہیداں ہے کہ زر خانۂ جم ہے

حلقہ کیے بیٹھے رہو اک شمع کو یارو

کچھ روشنی باقی تو ہے ہر چند کہ کم ہے