عشق منت کش قرار نہیں

عشق منت کش قرار نہیں

حسن مجبور انتظار نہیں

تیری رنجش کی انتہا معلوم

حسرتوں کا مری شمار نہیں

اپنی نظریں بکھیر دے ساقی

مے بہ اندازۂ خمار نہیں

زیر لب ہے ابھی تبسم دوست

منتشر جلوۂ بہار نہیں

اپنی تکمیل کر رہا ہوں میں

ورنہ تجھ سے تو مجھ کو پیار نہیں

چارۂ انتظار کون کرے

تیری نفرت بھی استوار نہیں

فیضؔ زندہ رہیں وہ ہیں تو سہی

کیا ہوا گر وفا شعار نہیں

ishq minnat kash-e-qarar nahin

husn majbur-e-intizar nahin

teri ranjish ki intiha maalum

hasraton ka miri shumar nahin

apni nazren bikher de saqi

mai ba andaza-e-khumar nahin

zer-e-lab hai abhi tabassum dost

muntashir jalwa-e-bahar nahin

apni takmil kar raha hun main

warna tujh se to mujh ko pyar nahin

chara-e-intizar kaun kare

teri nafrat bhi ustuwar nahin

faiz zinda rahen wo hain to sahi

kya hua gar wafa shiar nahin