اب کے برس دستور ستم میں کیا کیا باب ایزاد ہوئے

اب کے برس دستور ستم میں کیا کیا باب ایزاد ہوئے

جو قاتل تھے مقتول ہوئے جو صید تھے اب صیاد ہوئے

پہلے بھی خزاں میں باغ اجڑے پر یوں نہیں جیسے اب کے برس

سارے بوٹے پتہ پتہ روش روش برباد ہوئے

پہلے بھی طواف شمع وفا تھی رسم محبت والوں کی

ہم تم سے پہلے بھی یہاں منصورؔ ہوئے فرہادؔ ہوئے

اک گل کے مرجھانے پر کیا گلشن میں کہرام مچا

اک چہرہ کمھلا جانے سے کتنے دل ناشاد ہوئے

فیضؔ نہ ہم یوسفؔ نہ کوئی یعقوبؔ جو ہم کو یاد کرے

اپنی کیا کنعاں میں رہے یا مصر میں جا آباد ہوئے

ab ke baras dastur sitam mein kya kya bab izad hue

jo qatil the maqtul hue jo said the ab sayyad hue

pahle bhi khizan mein bagh ujre par yun nahin jaise ab ke baras

sare bute pata pata rawish rawish barbad hue

pahle bhi tawaf-e-sham-e-wafa thi rasm-e-mohabbat walon ki

ham tum se pahle bhi yahan mansur hue farhad hue

ik gul ke murjhane par kya gulshan mein kohram macha

ik chehra kamhla jane se kitne dil nashad hue

faiz na ham yusuf na koi yaaqub jo ham ko yad kare

apni kya kanan mein rahe ya misr mein ja abad hue