چاند نکلے کسی جانب تری زیبائی کا

چاند نکلے کسی جانب تری زیبائی کا

رنگ بدلے کسی صورت شب تنہائی کا

دولت لب سے پھر اے خسرو شیریں دہناں

آج ارزاں ہو کوئی حرف شناسائی کا

گرمئی رشک سے ہر انجمن گل بدناں

تذکرہ چھیڑے تری پیرہن آرائی کا

صحن گلشن میں کبھی اے شہ شمشاد قداں

پھر نظر آئے سلیقہ تری رعنائی کا

ایک بار اور مسیحائے دل دل زدگاں

کوئی وعدہ کوئی اقرار مسیحائی کا

دیدہ و دل کو سنبھالو کہ سر شام فراق

ساز و سامان بہم پہنچا ہے رسوائی کا

chand nikle kisi janib tiri zebai ka

rang badle kisi surat shab-e-tanhai ka

daulat lab se phir ai khusrau-e-shirin dahanan

aj arzan ho koi harf-e-shanasai ka

garmai rashk se har anjuman-e-gul badanan

tazkira chhere tiri pairahan arai ka

sehn-e-gulshan mein kabhi ai shah-e-shamshad qadan

phir nazar ae saliqa tiri raanai ka

ek bar aur masiha-e-dil dil zadagan

koi waada koi iqrar masihai ka

dida-o-dil ko sambhalo ke sar-e-sham-e-firaq

saz-o-saman baham pahuncha hai ruswai ka