ہم مسافر یوں ہی مصروف سفر جائیں گے

ہم مسافر یوں ہی مصروف سفر جائیں گے

بے نشاں ہو گئے جب شہر تو گھر جائیں گے

کس قدر ہوگا یہاں مہر و وفا کا ماتم

ہم تری یاد سے جس روز اتر جائیں گے

جوہری بند کئے جاتے ہیں بازار سخن

ہم کسے بیچنے الماس و گہر جائیں گے

نعمت زیست کا یہ قرض چکے گا کیسے

لاکھ گھبرا کے یہ کہتے رہیں مر جائیں گے

شاید اپنا بھی کوئی بیت حدی خواں بن کر

ساتھ جائے گا مرے یار جدھر جائیں گے

فیضؔ آتے ہیں رہ عشق میں جو سخت مقام

آنے والوں سے کہو ہم تو گزر جائیں گے

ham musafir yun hi masruf-e-safar jaenge

be nishan ho gae jab shahr to ghar jaenge

kis qadar hoga yahan mehr-o-wafa ka matam

ham tiri yad se jis roz utar jaenge

jauhari band kiye jate hain bazar-e-sukhan

ham kise bechne almas-o-guhar jaenge

nemat-e-zist ka ye qarz chukega kaise

lakh ghabra ke ye kahte rahen mar jaenge

shayad apna bhi koi bit hadi khwan ban kar

sath jaega mire yar jidhar jaenge

faiz ate hain rah-e-ishq mein jo sakht maqam

ane walon se kaho ham to guzar jaenge