کب تک دل کی خیر منائیں کب تک رہ دکھلاؤ گے

کب تک دل کی خیر منائیں کب تک رہ دکھلاؤ گے

کب تک چین کی مہلت دو گے کب تک یاد نہ آؤ گے

بیتا دید امید کا موسم خاک اڑتی ہے آنکھوں میں

کب بھیجو گے درد کا بادل کب برکھا برساؤ گے

عہد وفا یا ترک محبت جو چاہو سو آپ کرو

اپنے بس کی بات ہی کیا ہے ہم سے کیا منواؤ گے

کس نے وصل کا سورج دیکھا کس پر ہجر کی رات ڈھلی

گیسوؤں والے کون تھے کیا تھے ان کو کیا جتلاؤ گے

فیضؔ دلوں کے بھاگ میں ہے گھر بھرنا بھی لٹ جانا بھی

تم اس حسن کے لطف و کرم پر کتنے دن اتراؤ گے

kab tak dil ki khair manaen kab tak rah dikhlaoge

kab tak chain ki mohlat doge kab tak yad na aoge

bita did umid ka mausam khak urti hai ankhon mein

kab bhejoge dard ka badal kab barkha barsau ge

ahd-e-wafa ya tark-e-mohabbat jo chaho so ap karo

apne bas ki bat hi kya hai ham se kya manwaoge

kis ne wasl ka suraj dekha kis par hijr ki rat dhali

gesuon wale kaun the kya the un ko kya jatlaoge

faiz dilon ke bhag mein hai ghar bharna bhi lut jana bhi

tum us husn ke lutf-o-karam par kitne din itraoge