ترے غم کو جاں کی تلاش تھی ترے جاں نثار چلے گئے

ترے غم کو جاں کی تلاش تھی ترے جاں نثار چلے گئے

تری رہ میں کرتے تھے سر طلب سر رہ گزار چلے گئے

تری کج ادائی سے ہار کے شب انتظار چلی گئی

مرے ضبط حال سے روٹھ کر مرے غم گسار چلے گئے

نہ سوال وصل نہ عرض غم نہ حکایتیں نہ شکایتیں

ترے عہد میں دل زار کے سبھی اختیار چلے گئے

یہ ہمیں تھے جن کے لباس پر سر رہ سیاہی لکھی گئی

یہی داغ تھے جو سجا کے ہم سر بزم یار چلے گئے

نہ رہا جنون رخ وفا یہ رسن یہ دار کرو گے کیا

جنہیں جرم عشق پہ ناز تھا وہ گناہ گار چلے گئے

tire gham ko jan ki talash thi tire jan nisar chale gae

tiri rah mein karte the sar talab sar-e-rah guzar chale gae

tiri kaj adai se har ke shab-e-intizar chali gai

mire zabt-e-hal se ruth kar mire gham gusar chale gae

na sawal-e-wasl na arz-e-gham na hikayaten na shikayaten

tire ahd mein dil-e-zar ke sabhi ikhtiyar chale gae

ye hamen the jin ke libas par sar-e-rah siyahi likhi gai

yahi dagh the jo saja ke ham sar-e-bazm-e-yar chale gae

na raha junun-e-rukh-e-wafa ye rasan ye dar karoge kya

jinhen jurm-e-ishq pe naz tha wo gunah gar chale gae