سڑک کی بھیڑ میں جو کھو گیا ہے

سڑک کی بھیڑ میں جو کھو گیا ہے

وہ تنہا شخص اب تنہا ہوا ہے

کرن کے ہاتھ میں نیزہ ہے جب سے

مرا سایہ بہت گھبرا رہا ہے

فصیل جسم سے آگے کا رستہ

دھوئیں کے بادلوں میں کھو گیا ہے

مرے سینے کے اس اندھے کنوئیں میں

نہ جانے کس لیے وہ جھانکتا ہے

اسے آئینہ دکھلاؤ گے کیسے

وہ آدم زاد ہم سب کا خدا ہے

جبین شاخ پر کس بے کسی سے

لہو خورشید کا پھیلا ہوا ہے

سجا ہے جب سے شہرت کی دکاں میں

وہ پتھر تب سے ہیرا بن گیا ہے

sarak ki bhir mein jo kho gaya hai

wo tanha shakhs ab tanha hua hai

kiran ke hath mein neza hai jab se

mira saya bahut ghabra raha hai

fasil-e-jism se age ka rasta

dhuen ke badalon mein kho gaya hai

mire sine ke is andhe kanoen mein

na jane kis liye wo jhankta hai

use aina dikhlaoge kaise

wo adam zad ham sab ka khuda hai

jabin-e-shakh par kis be kisi se

lahu khurshid ka phaila hua hai

saja hai jab se shohrat ki dukan mein

wo patthar tab se hira ban gaya hai