نہیں دیتے کبھی دنیا کو دل اہل نظر اپنا

نہیں دیتے کبھی دنیا کو دل اہل نظر اپنا

کبھی مرغاب تر کرتا نہیں پانی سے پر اپنا

فنا کی رو میں بنیادیں نہ ٹھہریں قصر ہستی کی

ہوا اس موج طوفاں خیز سے برباد گھر اپنا

جہاں میں روح کو تن سے دکھاوے کی محبت تھی

نہ تھا وہ ہم سفر سمجھے تھے جس کو ہم سفر ہم اپنا

بتا دوں کیا تجھے زاہد جو دیکھا ہے وہ دیکھا ہے

تری آنکھوں میں کیوں کر ڈال دوں ذوق نظر اپنا

اسی بنسی کے نغموں کی ابھی مشتاق ہے جمنا

کہ موجیں آج تک ساحل سے ٹکراتی ہیں سر اپنا

خیال یار نے مرقد پہ کر دی نور کی بارش

مقدر کا ستارا بن گیا داغ جگر اپنا

مرے جام صبوحی میں اثر کیفیؔ دکھاتا ہے

کبھی رنگ شفق اپنا کبھی نور سحر اپنا

nahin dete kabhi duniya ko dil ahl-e-nazar apna

kabhi marghab tar karta nahin pani se par apna

fana ki rau mein buniyaden na thahren qasr-e-hasti ki

hawa is mauj-e-tufan khez se barbad ghar apna

jahan mein ruh ko tan se dikhawe ki mohabbat thi

na tha wo ham safar samjhe the jis ko ham safar ham apna

bata dun kya tujhe zahid jo dekha hai wo dekha hai

tiri ankhon mein kyun kar dal dun zauq-e-nazar apna

isi bansi ke naghmon ki abhi mushtaq hai jamuna

ke maujen aj tak sahil se takrati hain sar apna

khayal-e-yar ne marqad pe kar di nur ki barish

muqaddar ka sitara ban gaya dagh-e-jigar apna

mire jam-e-sabuhi mein asar kaifi dikhata hai

kabhi rang-e-shafaq apna kabhi nur-e-sahar apna