آج تک بہکا نہیں باہر سے دیوانہ ترا

آج تک بہکا نہیں باہر سے دیوانہ ترا

حوصلے میری نگاہوں کے ہیں پیمانہ ترا

رات بھر شبنم کی آنکھوں سے سحر کی مانگ میں

میں جسے لکھتا رہا وہ بھی تھا افسانہ ترا

یہ ترے دریا سلامت یہ ترے بادل بخیر

لٹ رہے ہیں خم پہ خم ثابت ہے مے خانہ ترا

آنسوؤں کی آب جو حائل ہے ورنہ لاؤں میں

میری نظروں کا شرر آنکھوں کا خس خانہ ترا

دل میں دھڑکن کی طرح سانسوں میں خوشبو کی طرح

اب خیالوں میں بھی کب آتا ہے وہ آنا ترا

اول اول تو تمازت دوپہر کے دشت کی

آخر آخر اپنی نظروں کو جھکا جانا ترا

ریزہ ریزہ کر گئی پتھر کو بھی شبنم کی چوٹ

ہائے کس دل سے مگر وہ مجھ کو سمجھانا ترا

aj tak bahka nahin bahar se diwana tira

hausle meri nigahon ke hain paimana tira

rat bhar shabnam ki ankhon se sahar ki mang mein

main jise likhta raha wo bhi tha afsana tira

ye tire dariya salamat ye tire badal bakhair

lut rahe hain kham pe kham sabit hai mai khana tira

ansuon ki ab ju hail hai warna laon main

meri nazron ka sharar ankhon ka khas khana tira

dil mein dharkan ki tarah sanson mein khushbu ki tarah

ab khayalon mein bhi kab ata hai wo ana tira

awwal awwal to tamazat dopahar ke dasht ki

akhir akhir apni nazron ko jhuka jana tira

reza reza kar gai patthar ko bhi shabnam ki chot

hae kis dil se magar wo mujh ko samjhana tira