سر فلک ہے کہ زیر زمیں پتہ نہ چلا

سر فلک ہے کہ زیر زمیں پتہ نہ چلا

ترا وجود تو ہے پر کہیں پتہ نہ چلا

کہاں چلے گئے وہ بوریا نشیں آخر

تمہیں تو کچھ بھی اے مسند نشیں پتہ نہ چلا

فلک کا بوجھ زمیں نے اٹھا لیا لیکن

فلک سے بھی ہے اٹھی یہ زمیں پتہ نہ چلا

تمہارے کوچے تک آیا تھا ایک آوارہ

پھر اس کے بعد تو اس کا کہیں پتہ نہ چلا

وہ تیرا در تھا کہ کاشی کہ خانۂ کعبہ

کہاں جھکائی تھی میں نے جبیں پتہ نہ چلا

عجیب تھی وہ شب وصل بھی نظرؔ جس میں

وہ میرے پاس بھی تھا یا نہیں پتہ نہ چلا

سڑک کی بھیڑ نے اس طرح مجھ کو نوچا تھا

کہاں تھی جیب کہاں آستیں پتہ نہ چلا

sar-e-falak hai ke zer-e-zamin pata na chala

tira wajud to hai par kahin pata na chala

kahan chale gae wo boriya nashin akhir

tumhen to kuchh bhi ai masnad nashin pata na chala

falak ka bojh zamin ne utha liya lekin

falak se bhi hai uthi ye zamin pata na chala

tumhare kuche tak aya tha ek awara

phir is ke baad to us ka kahin pata na chala

wo tera dar tha ke kashi ke khana-e-kaaba

kahan jhukai thi main ne jabin pata na chala

ajib thi wo shab-e-wasl bhi nazar jis mein

wo mere pas bhi tha ya nahin pata na chala

sarak ki bhir ne is tarah mujh ko nocha tha

kahan thi jeb kahan astin pata na chala