دل و جاں کے فسانے کیا ہوئے سب

دل و جاں کے فسانے کیا ہوئے سب

محبت کے ترانے کیا ہوئے سب

یہاں کچھ صوفیوں کا گھر تھا پہلے

وہ ان کے آستانے کیا ہوئے سب

پرانا پیڑ برگد کا کہاں ہے

پرندوں کے ٹھکانے کیا ہوئے سب

کہاں ہیں شہر کے بے فکر بچے

مسرت کے خزانے کیا ہوئے سب

برستی تھی محبت آسماں سے

وہ بارش کے زمانے کیا ہوئے سب

ترے اشعار پر یہ چپ سی کیوں ہے

نظرؔ تیرے دوانے کیا ہوئے سب

dil-o-jan ke fasane kya hue sab

mohabbat ke tarane kya hue sab

yahan kuchh sufiyon ka ghar tha pahle

wo un ke astane kya hue sab

purana per bargad ka kahan hai

parindon ke thikane kya hue sab

kahan hain shahr ke be fikr bachche

masarrat ke khazane kya hue sab

barasti thi mohabbat asman se

wo barish ke zamane kya hue sab

tire ashar par ye chup si kyun hai

nazar tere diwane kya hue sab