جو جھک کے ملتے تھے جلسوں میں مہرباں کی طرح

جو جھک کے ملتے تھے جلسوں میں مہرباں کی طرح

ہوئے ہیں سر پہ مسلط وہ آسماں کی طرح

مجھے جو کھولو تو ساحل قریب کر دوں گا

سمندروں میں میں رہتا ہوں بادباں کی طرح

تمہارے شہر کے جبری نظام میں کچھ لوگ

کبھی ہنسے بھی تو آواز تھی فغاں کی طرح

ہے تیز دھوپ سفر لمبا پر تمہاری یاد

ہے ایک سایہ مرے سر پہ سائباں کی طرح

نہ کوئی پتہ ہرا ہے نہ کوئی پھول کھلا

بہار بھی مرے گھر آئی ہے خزاں کی طرح

نہ صاف ذہن نہ چہرے کے خال و خط روشن

فضاؤں میں ہے ہر اک شے دھواں دھواں کی طرح

جہاں بھی جاؤں میں وہ دشت ہو کہ دریا ہو

دعائیں ماں کی چلیں ساتھ پاسباں کی طرح

نظرؔ کے نام کا اک شخص کچھ جنونی سا

اکیلا دشت میں چلتا ہے کارواں کی طرح

jo jhuk ke milte the jalson mein mehrban ki tarah

hue hain sar pe musallat wo asman ki tarah

mujhe jo kholo to sahil qarib kar dunga

samundaron mein main rahta hun badban ki tarah

tumhare shahr ke jabri nizam mein kuchh log

kabhi hanse bhi to awaz thi fughan ki tarah

hai tez dhup safar lamba par tumhari yad

hai ek saya mire sar pe saiban ki tarah

na koi pata hara hai na koi phul khula

bahar bhi mire ghar ai hai khizan ki tarah

na saf zehn na chehre ke khal-o-khat raushan

fazaon mein hai har ik shai dhuan dhuan ki tarah

jahan bhi jaun main wo dasht ho ke dariya ho

duaen man ki chalen sath pasban ki tarah

nazar ke nam ka ik shakhs kuchh jununi sa

akela dasht mein chalta hai karwan ki tarah