دیواروں سے مل کر رونا اچھا لگتا ہے

دیواروں سے مل کر رونا اچھا لگتا ہے

ہم بھی پاگل ہو جائیں گے ایسا لگتا ہے

کتنے دنوں کے پیاسے ہوں گے یارو سوچو تو

شبنم کا قطرہ بھی جن کو دریا لگتا ہے

آنکھوں کو بھی لے ڈوبا یہ دل کا پاگل پن

آتے جاتے جو ملتا ہے تم سا لگتا ہے

اس بستی میں کون ہمارے آنسو پونچھے گا

جو ملتا ہے اس کا دامن بھیگا لگتا ہے

دنیا بھر کی یادیں ہم سے ملنے آتی ہیں

شام ڈھلے اس سونے گھر میں میلہ لگتا ہے

کس کو پتھر ماروں قیصرؔ کون پرایا ہے

شیش محل میں اک اک چہرا اپنا لگتا ہے

diwaron se mil kar rona achchha lagta hai

ham bhi pagal ho jaenge aisa lagta hai

kitne dinon ke pyase honge yaro socho to

shabnam ka qatra bhi jin ko dariya lagta hai

ankhon ko bhi le duba ye dil ka pagal pan

ate jate jo milta hai tum sa lagta hai

is basti mein kaun hamare ansu ponchhega

jo milta hai us ka daman bhiga lagta hai

duniya bhar ki yaden ham se milne ati hain

sham dhale is sone ghar mein mela lagta hai

kis ko patthar marun qaisar kaun paraya hai

shish mahal mein ik ik chehra apna lagta hai