دن کی بے درد تھکن چہرے پہ لے کر مت جا

دن کی بے درد تھکن چہرے پہ لے کر مت جا

بام و در جاگ رہے ہوں گے ابھی گھر مت جا

میرے پرکھوں کی وراثت کا بھرم رہنے دے

تو حویلی کو کھلا دیکھ کے اندر مت جا

بوند بھر درد سنبھلتا نہیں کم ظرفوں سے

رکھ کے تو اپنی ہتھیلی پہ سمندر مت جا

پھوٹنے دے مری پلکوں سے ذرا اور لہو

اے مری نیند ابھی چھوڑ کے بستر مت جا

کچھ تو رہنے دے ابھی ترک وفا کی خاطر

تجھ کو جانا ہے تو جا ہاتھ جھٹک کر مت جا

اور کچھ دیر یہ مشق نگہ ناز سہی

سامنے بیٹھ ابھی پھینک کے خنجر مت جا

دھوپ کیا ہے تجھے اندازہ نہیں ہے قیصرؔ

آبلے پاؤں میں پڑ جائیں گے باہر مت جا

din ki be dard thakan chehre pe le kar mat ja

bam-o-dar jag rahe honge abhi ghar mat ja

mere purkhon ki wirasat ka bharam rahne de

tu haweli ko khula dekh ke andar mat ja

bund bhar dard sambhalta nahin kam zarfon se

rakh ke to apni hatheli pe samundar mat ja

phutne de miri palkon se zara aur lahu

ai miri nind abhi chhor ke bistar mat ja

kuchh to rahne de abhi tark-e-wafa ki khatir

tujh ko jana hai to ja hath jhatak kar mat ja

aur kuchh der ye mashq-e-nigah-e-naz sahi

samne baith abhi phenk ke khanjar mat ja

dhup kya hai tujhe andaza nahin hai qaisar

able paon mein par jaenge bahar mat ja