آنکھ ہر شب کو اندھیروں کی قبا دھوتی ہے

آنکھ ہر شب کو اندھیروں کی قبا دھوتی ہے

خواب کی ریت میں سورج کا شجر بوتی ہے

ایک گمنامی کا جنگل ہوں جہاں شکل مری

اپنی پہچان کا ہر نقش یقیں کھوتی ہے

دور ان دیکھی سی سرحد ہے کہ جس کے اس پار

کوئی بستی ہے جو راتوں کو سدا روتی ہے

سطح چادر پہ شکن اور سر بالیں پہ نشیب

یہ تو تنہائی ہے بستر پہ مرے سوتی ہے

بھولی بسری ہوئی یادوں کی عجب بھیڑ ہے جو

دل کے دروازے پہ ہر شام لگی ہوتی ہے

ankh har shab ko andheron ki qaba dhoti hai

khwab ki ret mein suraj ka shajar boti hai

ek gumnami ka jangal hun jahan shakl miri

apni pahchan ka har naqsh-e-yaqin khoti hai

dur an dekhi si sarhad hai ke jis ke us par

koi basti hai jo raton ko sada roti hai

sath-e-chadar pe shikan aur sar-e-balin pe nasheb

ye to tanhai hai bistar pe mire soti hai

bhuli bisri hui yadon ki ajab bhir hai jo

dil ke darwaze pe har sham lagi hoti hai