جہاں دھواں تھا وہیں روشنی کے داغ بھی تھے

جہاں دھواں تھا وہیں روشنی کے داغ بھی تھے

مرے مکان کے ملبے میں کچھ چراغ بھی تھے

ذرا سی دیر میں محفل کو کیا ہوا یا رب

ابھی تو شام بھی تھی مے بھی تھی ایاغ بھی تھے

زمین بیچ کے رہتے تھے آسمانوں پر

مرے بزرگوں میں وہ صاحب فراغ بھی تھے

خدا بھی دیکھ کے چپ تھا کہ میرے دامن میں

جہاں گناہ وہیں آنسوؤں کے داغ بھی تھے

جو ہم جلے تو دل و جاں چمک اٹھے قیصرؔ

بہت دنوں سے یہ ویرانے بے چراغ بھی تھے

jahan dhuan tha wahin raushni ke dagh bhi the

mire makan ke malbe mein kuchh charagh bhi the

zara si der mein mahfil ko kya hua ya rab

abhi to sham bhi thi mai bhi thi ayagh bhi the

zamin bech ke rahte the asmanon par

mire buzurgon mein wo sahab-e-faragh bhi the

khuda bhi dekh ke chup tha ke mere daman mein

jahan gunah wahin ansuon ke dagh bhi the

jo ham jale to dil-o-jan chamak uthe qaisar

bahut dinon se ye wirane be charagh bhi the