پھر مرے سر پہ کڑی دھوپ کی بوچھار گری

پھر مرے سر پہ کڑی دھوپ کی بوچھار گری

میں جہاں جا کے چھپا تھا وہیں دیوار گری

لوگ قسطوں میں مجھے قتل کریں گے شاید

سب سے پہلے مری آواز پہ تلوار گری

اور کچھ دیر مری آس نہ ٹوٹی ہوتی

آخری موج تھی جب ہاتھ سے پتوار گری

اگلے وقتوں میں سنیں گے در و دیوار مجھے

میری ہر چیخ مرے عہد کے اس پار گری

خود کو اب گرد کے طوفاں سے بچاؤ قیصرؔ

تم بہت خوش تھے کہ ہم سایے کی دیوار گری

phir mire sar pe kari dhup ki bauchhar giri

main jahan ja ke chhupa tha wahin diwar giri

log qiston mein mujhe qatl karenge shayad

sab se pahle miri awaz pe talwar giri

aur kuchh der miri as na tuti hoti

akhiri mauj thi jab hath se patwar giri

agle waqton mein sunenge dar-o-diwar mujhe

meri har chikh mire ahd ke us par giri

khud ko ab gard ke tufan se bachao qaisar

tum bahut khush the ke ham saye ki diwar giri