یوں بڑی دیر سے پیمانہ لیے بیٹھا ہوں

یوں بڑی دیر سے پیمانہ لیے بیٹھا ہوں

کوئی دیکھے تو یہ سمجھے کہ پئے بیٹھا ہوں

آخری ناؤ نہ آئی تو کہاں جاؤں گا

شام سے پار اترنے کے لیے بیٹھا ہوں

مجھ کو معلوم ہے سچ زہر لگے ہے سب کو

بول سکتا ہوں مگر ہونٹ سیے بیٹھا ہوں

لوگ بھی اب مرے دروازے پہ کم آتے ہیں

میں بھی کچھ سوچ کے زنجیر دیے بیٹھا ہوں

زندگی بھر کے لیے روٹھ کے جانے والے

میں ابھی تک تری تصویر لیے بیٹھا ہوں

کم سے کم ریت سے آنکھیں تو بچیں گی قیصرؔ

میں ہواؤں کی طرف پیٹھ کیے بیٹھا ہوں

yun bari der se paimana liye baitha hun

koi dekhe to ye samjhe ke piye baitha hun

akhiri nao na ai to kahan jaunga

sham se par utarne ke liye baitha hun

mujh ko maalum hai sach zahr lage hai sab ko

bol sakta hun magar hont saye baitha hun

log bhi ab mire darwaze pe kam ate hain

main bhi kuchh soch ke zanjir diye baitha hun

zindagi bhar ke liye ruth ke jane wale

main abhi tak tiri taswir liye baitha hun

kam se kam ret se ankhen to bachengi qaisar

main hawaon ki taraf pith kiye baitha hun