Arooz is now on the App Store, for iPhone and iPad. Download →

All poetry

گھر بسا کر بھی مسافر کے مسافر ٹھہرے

Qaisarul Jafri (1926–2005)

گھر بسا کر بھی مسافر کے مسافر ٹھہرے

لوگ دروازوں سے نکلے کہ مہاجر ٹھہرے

دل کے مدفن پہ نہیں کوئی بھی رونے والا

اپنی درگاہ کے ہم خود ہی مجاور ٹھہرے

اس بیاباں کی نگاہوں میں مروت نہ رہی

کون جانے کہ کوئی شرط سفر پھر ٹھہرے

پتیاں ٹوٹ کے پتھر کی طرح لگتی ہیں

ان درختوں کے تلے کون مسافر ٹھہرے

خشک پتے کی طرح جسم اڑا جاتا ہے

کیا پڑی ہے جو یہ آندھی مری خاطر ٹھہرے

شاخ گل چھوڑ کے دیوار پہ آ بیٹھے ہیں

وہ پرندے جو اندھیروں کے مسافر ٹھہرے

اپنی بربادی کی تصویر اتاروں کیسے

چند لمحوں کے لیے بھی نہ مناظر ٹھہرے

تشنگی کب کے گناہوں کی سزا ہے قیصرؔ

وہ کنواں سوکھ گیا جس پہ مسافر ٹھہرے