ساری دنیا کے تعلق سے جو سوچا جاتا

ساری دنیا کے تعلق سے جو سوچا جاتا

آدمی اتنے قبیلوں میں نہ بانٹا جاتا

دل کا احوال نہ پوچھو کہ بہت روز ہوئے

اس خرابے کی طرف میں نہیں آتا جاتا

زندگی تشنہ دہانی کا سفر تھی شاید

ہم جدھر جاتے اسی راہ پہ صحرا جاتا

شام ہوتے ہی کوئی شمع جلا رکھنی تھی

جب دریچے سے ہوا آتی تو دیکھا جاتا

روشنی اپنے گھروندوں میں چھپی تھی ورنہ

شہر کے شہر پہ شب خون نہ مارا جاتا

سارے کاغذ پہ بچھی تھیں مری آنکھیں قیصرؔ

اتنے آنسو تھے کہ اک حرف نہ لکھا جاتا

sari duniya ke taalluq se jo socha jata

admi itne qabilon mein na banta jata

dil ka ahwal na puchho ke bahut roz hue

is kharabe ki taraf main nahin ata jata

zindagi tishna dahani ka safar thi shayad

ham jidhar jate isi rah pe sahra jata

sham hote hi koi shama jala rakhni thi

jab dariche se hua ati to dekha jata

raushni apne gharaundon mein chhupi thi warna

shahr ke shahr pe shab khun na mara jata

sare kaghaz pe bichhi thin miri ankhen qaisar

itne ansu the ke ik harf na likha jata