ذہن میں کون سے آسیب کا ڈر باندھ لیا

ذہن میں کون سے آسیب کا ڈر باندھ لیا

تم نے پوچھا بھی نہیں رخت سفر باندھ لیا

بے مکانی کی بھی تہذیب ہوا کرتی ہے

ان پرندوں نے بھی ایک ایک شجر باندھ لیا

راستے میں کہیں گر جائے تو مجبوری ہے

میں نے دامان دریدہ میں ہنر باندھ لیا

اپنے دامن پہ نظر کر مرے ہاتھوں پہ نہ جا

میں نے پتھراؤ کیا تو نے ثمر باندھ لیا

گھر کھلا چھوڑ کے چپکے سے نکل جاؤں گا

شام ہی سے سر و سامان سحر باندھ لیا

عمر بھر میں نے بھی ساحل کے قصیدے لکھے

میرے بچوں نے بھی اک ریت کا گھر باندھ لیا

ہار بے درد ہواؤں سے نہ مانی قیصرؔ

بادباں پھینک کے قدموں سے بھنور باندھ لیا

zehn mein kaun se aseb ka dar bandh liya

tum ne puchha bhi nahin rakht-e-safar bandh liya

be makani ki bhi tahzib hua karti hai

in parindon ne bhi ek ek shajar bandh liya

raste mein kahin gir jae to majburi hai

main ne daman-e-darida mein hunar bandh liya

apne daman pe nazar kar mire hathon pe na ja

main ne pathrao kiya tu ne samar bandh liya

ghar khula chhor ke chupke se nikal jaunga

sham hi se sar-o-saman-e-sahar bandh liya

umr bhar main ne bhi sahil ke qaside likhe

mere bachchon ne bhi ik ret ka ghar bandh liya

har be dard hawaon se na mani qaisar

badban phenk ke qadmon se bhanwar bandh liya