برسوں کے رت جگوں کی تھکن کھا گئی مجھے

برسوں کے رت جگوں کی تھکن کھا گئی مجھے

سورج نکل رہا تھا کہ نیند آ گئی مجھے

رکھی نہ زندگی نے مری مفلسی کی شرم

چادر بنا کے راہ میں پھیلا گئی مجھے

میں بک گیا تھا بعد میں بے صرفہ جان کر

دنیا مری دکان پہ لوٹا گئی مجھے

دریا پہ ایک طنز سمجھئے کہ تشنگی

ساحل کی سرد ریت میں دفنا گئی مجھے

اے زندگی تمام لہو رائیگاں ہوا

کس دشت بے سواد میں برسا گئی مجھے

کاغذ کا چاند رکھ دیا دنیا نے ہاتھ میں

پہلے سفر کی رات ہی راس آ گئی مجھے

کیا چیز تھی کسی کی ادائے سپردگی

بھیگے بدن کی آگ میں نہلا گئی مجھے

قیصرؔ قلم کی آگ کا احسان مند ہوں

جب انگلیاں جلیں تو غزل آ گئی مجھے

barson ke rut jagon ki thakan kha gai mujhe

suraj nikal raha tha ke nind a gai mujhe

rakhi na zindagi ne miri muflisi ki sharm

chadar bana ke rah mein phaila gai mujhe

main bik gaya tha baad mein be sarfa jan kar

duniya miri dukan pe lauta gai mujhe

dariya pe ek tanz samajhiye ke tishnagi

sahil ki sard ret mein dafna gai mujhe

ai zindagi tamam lahu raigan hua

kis dasht-e-be sawad mein barsa gai mujhe

kaghaz ka chand rakh diya duniya ne hath mein

pahle safar ki rat hi ras a gai mujhe

kya chiz thi kisi ki ada-e-supurdagi

bhige badan ki ag mein nahla gai mujhe

qaisar qalam ki ag ka ehsan mand hun

jab ungliyan jalen to ghazal a gai mujhe