ہم نے لکھے تھے ہواؤں میں فسانے اپنے

ہم نے لکھے تھے ہواؤں میں فسانے اپنے

اڑ گئے ایک ہی جھونکے میں زمانے اپنے

سونی آنکھوں میں تلاشو نہ وفا کے موتی

ہم لٹا آئے کہیں اور خزانے اپنے

بند پلکوں پہ یہ کس درد نے دستک دی ہے

ٹوٹ جائیں نہ کہیں خواب سہانے اپنے

ہم دریچے پہ کھڑے ہو کے کہاں تک سوچیں

چاند ہر روز بدلتا ہے ٹھکانے اپنے

کون پروانہ بنے کون جلے کس کے لیے

شمع خود بیٹھ کے اب روئے سرہانے اپنے

ہم نے توڑا نہیں ماضی سے تعلق قیصرؔ

ہر نئے شعر میں آنسو ہیں پرانے اپنے

ham ne likhe the hawaon mein fasane apne

ur gae ek hi jhonke mein zamane apne

suni ankhon mein talasho na wafa ke moti

ham luta ae kahin aur khazane apne

band palkon pe ye kis dard ne dastak di hai

tut jaen na kahin khwab suhane apne

ham dariche pe khare ho ke kahan tak sochen

chand har roz badalta hai thikane apne

kaun parwana bane kaun jale kis ke liye

shama khud baith ke ab ru-e-sirhane apne

ham ne tora nahin mazi se taalluq qaisar

har nae sher mein ansu hain purane apne